Sang Hyang Yesus Ngedengang Angga Malih
21
Sasampune makudang dina,
Sang Hyang Yesus ngedengang angga malih pisan kapining para sisian Idane ring Danu Tiberias,
sane pada kasambat Danu Galilea.
Paindikane punika mamargi sekadi puniki:
2 Ring dina anu,
wenten makudang sisia mapunduh,
inggih punika,
I Simon Petrus,
I Tomas sane kasambat I Kembar,
I Natanael anak saking Kota Kana sane ring Galilea,
makakalih okan I Sebedeus lan wenten pada kalih sisia sane lianan.
3 I Simon Petrus raris mabaos kapining para sisiane sane lianan sekadi puniki,
“Tiang bakal luas mencar.”
Ipun sami raris nyaurin I Simon Petrus sapuniki,
“Tiang milu luas ajak ragane.”
Raris ipun sami luas menek jukung.
Yadiastun apeteng ipun mencar,
aukud ja ipun nenten polih ulam.
4 Ritatkala semeng ngremeng,
Sang Hyang Yesus ngadeg ring pasisir pasihe.
Nanging ipun sami nenten uning Anake punika Sang Hyang Yesus.
5 Irika raris Ida ngandika kapining ipun sapuniki,
“Wih cening ajak makejang,
ada ke cening maan be?”
Ipun sami raris masaur sapuniki,
“Nenten.”
6 Sang Hyang Yesus ngandika malih kapining ipun sapuniki,
“Pulang ja pencare di sisi kenawan jukunge.
Ditu ragane bakal maan be!”
Raris ipun mulang malih pencarnyane.
Tur ipun nenten mresidayang ngedeng pencare krana akeh madaging ulam.
7 Raris sisiane sane kasayangina olih Sang Hyang Yesus mabaos kapining I Petrus sapuniki,
“Anake punika Sang Ratu Agung!”
Ritatkala mirengin paindikane punika,
I Petrus raris nyaluk bajunnyane krana ipun nenten mabaju.
Raris ipun macebur ka toyane.
8 Nanging para sisiane sane lianan nugtug ka pasisir pasihe nganggen jukung sambilanga ngedeng pencare sane akeh madaging ulam punika.
Duk punika,
ipun sami nenten ja adoh saking pasisir pasihe,
sawetara satus (100) meter adohnyane.
9 Ritatkala ipun tedun saking jukunge,
kacingakin wenten api nganggen adeng.
Tur ring duur apine punika wenten ulam lan roti.
10 Sang Hyang Yesus raris ngandika kapining ipun sami sapuniki,
“Aba ja mai makudang ukud ebene ane mara bakat ragane!”
11 I Simon Petrus raris munggah ka jukunge tur ngedeng pencare ka pasisir pasihe.
Ring pencare punika akeh wenten ulam sane ageng;
akehne karoblah nanggu telung (153) ukud.
Yadiastun sapunika,
pencare nenten ja uek.
12 Sang Hyang Yesus raris ngandika kapining ipun sami sapuniki,
“Mai ja madaar malu.”
Duk punika,
nenten wenten saking ipun sane bani mataken “Sirake Iratu?”
Krana ipun uning Anake punika nenten tios Sang Ratu Agung.
13 Sang Hyang Yesus nampekin ipun raris ngambil rotine mangda kicen buat ipun sami.
Kenten pada Ida ngicen ipun ulam.
14 Sekadi punika kaping tigane,
Ida ngedengang angga kapining para sisiane sasampun Ida maurip malih saking anake padem.
Angonang ja Biri-birin Tiange
15 Sasampune ipun sami ngajeng,
Sang Hyang Yesus raris ngandika kapining I Simon Petrus sapuniki,
“Wih Simon,
pianak I Yohanese,
apake tresnan ceninge teken Nira gedenan teken tresnan anake ane ada dini?”
I Petrus raris matur sapuniki,
“Inggih patut,
duh Sang Ratu Agung.
Iratu uning indik titiang tresna kapining Iratu.”
Sang Hyang Yesus raris ngandika sapuniki,
“Piara ja para pengiring Nirane ane buka biri-biri.”
16 Kaping kalihne Ida mataken malih sapuniki,
“Simon,
pianak I Yohanes,
apake cening tresna kapining Nira?”
I Petrus malih matur sapuniki,
“Inggih patut,
Sang Ratu Agung.
Iratu uning indik titiang tresna kapining Iratu.”
Sang Hyang Yesus raris ngandika sapuniki,
“Angonang ja biri-birin Nirane.”
17 Kaping tigane Ida mataken malih sapuniki,
“Simon,
pianak I Yohanes,
apake cening tresna kapining Nira?”
Irika I Petrus sebet manahnyane krana kaping tigane Ida mataken sekadi punika.
I Petrus raris matur sapuniki,
“Duh Sang Ratu Agung,
Iratu uning sekancan paindikan.
Iratu uning indik titiang tresna kapining Iratu!”
Sang Hyang Yesus raris ngandika malih sapuniki,
“Piara ja biri-birin Nirane.
18 Nira ngandikayang ane patut,
sujatine tatkala cening nu nguda,
cening negulang sabuk padidi,
tur cening luas sakita keneh ceninge.
Sakewala,
disubane cening tua,
cening bakal nyerahang liman ceninge,
lan anak len bakal negul cening tur ngajak cening ka tongos ane tusing enyakin cening.”
19 Ida ngandika sapunika nerangang indik punapike carane I Petrus padem buat ngagungang Sang Hyang Pengardi.
Sasampune kenten,
Sang Hyang Yesus ngandika kapining I Petrus sapuniki,
“Tugtug ja Tiang!”
Sang Hyang Yesus sareng Sisiane sane Tresnain Ida
20 Ritatkala I Petrus nyingakin kuri,
irika ipun nyingakin sisiane sane kasayangin olih Sang Hyang Yesus.
Sisiane punika nenten tios anak sane malinggih nampek Sang Hyang Yesus ritatkala ngajeng ring rarainan Paskah.
Ipun anak sane mataken kapining Ida sapuniki,
“Ratu,
sapa sirake anake sane jagi nyerahang Iratu kapining para penguasane?”
21 Nyingakin sisiane sane ring dori punika,
I Petrus mataken kapining Sang Hyang Yesus sapuniki,
“Sang Ratu Agung,
napike sane jagi mamargi ring anake puniki?”
22 Sang Hyang Yesus raris masaur sapuniki,
“Yening Nira dot ia nu idup kanti sapengrauh Nirane buin pidan,
ento tusing ja urusan ceninge.
Sakewala cening,
tugtug ja Nira!”
23 Krana paindikane punika,
wenten pakrimik ring para sisiane sami,
yening sisiane punika nenten jagi padem.
Sujatine Sang Hyang Yesus nenten ngandikayang sekadi punika,
nanging Ida wantah ngandika sekadi puniki,
“Yening Nira dot ia nu idup kanti sapengrauh Nirane buin pidan,
ento tusing ja urusan ceninge.”
Baos Pamuput
24 Sisiane punika sane ngicen sekancan kasaksiane puniki,
tur ipun pada sane nulis paindikane puniki.
Iraga uning napi sane kaceritayang puniki yakti patut.
25 Kari akeh paindikan lianan sane kalaksanayang olih Sang Hyang Yesus.
Yening makasami paindikane punika katulis ring bukune,
tiang ngrasayang nenten wenten genah ring saluirin jagate buat nyimpen buku-bukune punika.